rime d'autore...noto

A CAPUZZUNI
ricordando Franco Di Marco

                                                                                                                             Curriti, prestu, curriti…!

chi ffu? cu fu?
curriti!
scappau focu a Tramuntana
dâ Turri Lignì finu â Culummara,
focu ranni: ‘u suli pigghiau focu!
e ‘u mari è rrussu,
‘u culuri dû sangu
dî tunni chi sputanu l’anima
nna cammara dâ morti.
Currinu ‘i trapanisi
masculi fimmini
vecchi e picciriddi
currinu â Marina, â Piscarìa:
bedda Matri Santissima ri Trapani!
veru è! talìa: ‘u suli avvampa,
a picca a picca va squagghiannu,
si fici ‘a metà, chiama aiùtu…
tuttu ‘na vota si jecca a mari,
a capuzzuni…
Dû funnu di lu funnu di lu mari
scura assumma la sira.

---

Ottobre 2008

 'A minigonna

Stanotti ‘nsonnu mi vinni 'a nonna:

era ‘ncasa mia, o Burgu, vicinu a Maronna.

-Assabinirica, nonna! ma chi facci longa...

chi cc'è, chi fù, successi cosa?-

-   E mu dumanni!? na cosa vergognosa,

disgustosa, libidinosa, ingiuriosa,

ch'offenni ogni cuscenza riliggiosa:

robba ri fari sbummicari

puru li santi supra l'artari-

Insomma, sta cristiana di me nonna

ci l'avia a morti ca... minigonna!

E parlannu avia l’affannu:

-Ci penzi? sti fimmini r’ovannu  

‘unnannu cchiù ritegnu,

si vannu annacannu e fissiannu

(tantu, chi chiffari annu!),

e pi ffari i baggiani

si cumminanu comu i buttani!

Sfacciati, mascariati:

i capiddi ossiginati,

l’occhi pittati,

i causi attillati,

i minni puntati..;.

E ora, ancora,

ca scusa ra mora,

puru i cosci di fora!                                         

 Ammenu avissiru i riquisiti:

slanciati, lisci, beddi torniti,

una cci rici: va bbeni, iti!     

Ma si viri ‘ngiru, di sutta i biddichi,

spuntari du’ cosi storti, smorti, fini comu palichi;

opuru certi sosizzuna lardiati,

curti, sfatti, robba c'arresta ammusciatu

u vecchiu, u picciottu e puru u surdatu     

••••chi dici, avi tortu to’ nonna,

chi 'un ci cala la minigonna!?-

-Ma no, chi dici! santi paroli, nonna!

veru è,è na vriogna!-

                       A’ punta violu  (a Peo)

Un saccu supra i spaddi,

a forza d’un liuni,

u focu dî  vintanni,

leggeru cumu ‘npassaru

vai caminannu, vulannu

pi’ strati du munnu:

avanti, sempri avanti.

Assittatu supra un timpùni

m’asciugu u sururi,

pigghiu ricialu

e aspettu.

A’ punta violu.

                                        (1987)

Na vecchia

Tutt'unaota la vitti,

e arristai  agghiacciatu;

b i anca, s tanca, caruta.

Cannila chi s'astuta,

micciu cu na larma r'ogghiu,

luninu chi trema

a ogni ciatu 'i  ventu.

                                    (1986)

        Miciu

Stanotti, ne' matinati

mi   sunnai un gattu,

^,nfangatu,  vecchiu, malatu,

u  pilu manciata, tuttu ciunnatu.

Era iddu:  u attu battizzatu  miciu

ddu jornu chi mu regalau me ziu.

Miau, miau, runfuliava,

curcatu cu mia

comu a ddu  tempu r'Argintaria.

-Miau, miau, miau,

ri quannu partisti

nuddu cchiù. m'accarizzau;

ma poi, rimmi, picchì  t’innisti?

chi fissarìa chi facisti!-

Cì stava spiegannu

comu e quannu,

ma a sveglia, corpu ri sangu,

m'arruspigghiau...

Mancu u tenpu di ririci: ciau, miau!:

Curvi… piriculusi

Nzamai cu to mogghi, no’ riscursu,

ti scappassi chi Carmen Russo

è 'na fimmina di lusso,

robba r'alliccarisi u raussu!

Si’ cunsumatu:

t’abbuschi  un  gran lisci e bussu,

e poi..., pi 'na simana,

ti poi stuiari u mussu.

Pecciò,ascuta a mia,

tenitiIla pi  tia,

na’ saristìa di la fantasia.

E si dopu cena,

bedda  abbunnanti,

vieta ravanti

o puru ri schiena,

ti cumpari sta sirena,

puru s'arresti spinnatu

comu un cani vastuniatu,

lestu...cancia canali:

pi la paci coniugali,

megghiu a tribuna elettorali

chi finiri drittu o’ spitali.

                                    (1987)      

Curve pericolose                   (traduzione per gli...italiani!)

                                                     Non sia mai che con tua moglie, nel discorso,

ti scappasse detto che Carmen Russo

è una femmina di lusso,

roba da   leccarsi il musso!

Sei consumato:

ti buschi un gran liscio e busso,

e poi, per una settimana,

ti puoi pulire il musso.

Perciò,dai ascolto a me:

tienitela per te,

nella sagrestia della fantasia.

E se dopo cena,

bella abbondante,                                                                 

vista davanti

oppure di schiena,

ti compare sta sirena,

pure se resti allupato

come un cane bastonato,

cambia lesto canale:

per la pace coniugale,

meglio la tribuna elettorale

che finire dritto in ospedale!

I cunfetti

Na’  tuttu u munnu,

quannu unu si marita,

a festa si cunchiuri

chi cunfetti di la zita.

Di fora è bianca, nzuccarata,

rintra c’è a mennula atturrata:

ma tintu si ti capita amara:

a ucca t’arresta tutta ‘nfittata.

Hai chi sciacquari sutta a funtana!

A’ caruta:

si la zita ti capitau buttana,

figgi meu, chi sciacqui a fari?!

‘un ci pinzari: jeccati a mari!

                                      (1980)

Curri quantu voi: tèniri t’hai!

Stiornu, o’ Curtigghiolu,

nto jardinu di me cucìnu,

(zabbari, ficurinia e piddusinu)

na gran manciata di pisci, pani e vinu,

…m’jccai vistutu supra u littinu.

Deci minuti,  a panza sutta, un pisolinu.

‘Na bedda arietta di tramontana,

silenziu di seculi, ‘na paci arcana:

u runfuliari du mari, ‘na luci d’annurvari,

luntanu ‘na varca  a muturi,

no’ scogghiu ‘nvecchiu piscaturi.

Dimmi tu, chi putia fari?!

Puru a mia s’intisi runfuliari.

...e chistu cu è?!
ma iò  u canusciu!

Un giannettu biancu,

chi curria e trippiava mai stancu…

supra lu Munti, sutta a salina,

‘u mari, ‘a rina,

un mari di rina.

-      Ancora curri?! Arruspigghiati, è tardu!-

Mi stinnicchiu e rapu n’occhiu,

a pampinedda:

supra ‘na nuvula sorridenti

mi saluta Paparedda.

                                           (1981)

Parce sepultis

L'autra sira, riuniti a macararu,

n'amicu nostru, 'nguaiatu cu l'erariu,

vulia sapiri l'ubicazioni

di lu palazzu di l'inquisizioni,

o veru sia l'ufficiu di l'imposti diretti,

unni ti sfilanu scarpi e cosetti

e i picciuli ti li sucanu a carretti.

E mentri chiddu si senti abbruciari,

a niautri 'stu fattu di ubicari

ni facia ririri e sbiddicari,

picchi unu, amanti ra parlata nustrana

(chi - dici - è matri di la lingua italiana),

cunsurtannu vinti libbra e cinqu dizziunari

si misi a raggiunari pi dimustrari chi

ubicare è paru paru comu urvicari.

Difatti, rici, ubicare

- nella burocratica dizzioni -

voli riri: postu, pusizioni.

E, nta st'uffici, ti pari chi fannu?

'na vota ch'acchiapparu lu postu

tuttu u chiffari è sturiari 'a pusizioni

unni urvicari li pratichi in visioni

(rannucci prima l'estremunzioni)

e passari lu tempu aspittannu 'a pinzioni.